Onte, recibimos en Lobios ao delegado territorial da Xunta de Galicia en Ourense, Manuel Pardo, que xunto coa nosa alcaldesa, María del Carmen Yáñez, visitou os traballos arqueolóxicos que se están a desenvolver no xacemento da Fraga Raxada.
A actuación, impulsada pola Consellería de Cultura, Lingua e Xuventude, conta cun investimento de máis de 18.000 euros e forma parte das intervencións arqueolóxicas previstas para 2025 pola Dirección Xeral de Patrimonio Cultural, co obxectivo de coñecer, conservar e poñer en valor o noso patrimonio arqueolóxico.
No castro da Fraga Raxada estanse a realizar labores de investigación e documentación nunha área de arredor de 60 m², ampliando a escavación na zona da torre e caracterizando todos os recintos e estruturas documentadas na campaña anterior. Ademais, levarase a cabo o levantamento topográfico e fotogrametría 3D, así como o estudo e tratamento dos materiais arqueolóxicos recuperados.
Dende o Concello de Lobios seguimos a apoiar todas as iniciativas que contribúan á protección e difusión do noso valioso patrimonio histórico e cultural.
